Byrknes Ocean Resort har inngått avtale med den kjende stjernekokken Christopher Haatuft, som har teke på seg oppdraget som matfagleg ansvarleg for restaurant- og matkonseptet ved hotellet.

Haatuft er blant anna kjent for å stå bak stjernerestauranten Lysverket i Bergen.

Med solid erfaring, ein sterk fagleg profil og stor lidenskap for gode råvarer, skal Haatuft bidra til å utvikle eit kjøkken som speglar både havet, kystkulturen og det unike landskapet rundt Byrknesøy. Han ynskjer å skapa ei reise i baskisk matfilosofi med fisk og skalldyr i sentrum.

– Vi er svært glade for å få med oss ein så dyktig og inspirerande kapasitet på laget. Ambisjonen er å skape matopplevingar som blir ein viktig del av heilskapen ved Byrknes Ocean Resort, seier Even Hopland, styreleiar.

Hotellet er under utvikling på Byrknes i Gulen kommune og skal etter planen opne i september 2027.